ភ្នំពេញ៖ ការប្រកួតបាល់ទាត់ជម្រើសជើងឯកជាតិ Metfone Cambodian League បានរំកិលខ្លួនមកដល់សប្តាហ៍ទី០៨ ហើយ ខណៈថ្ងៃពុធ ទី១៤ ខែកក្កដានេះមានការប្រកួតចំនួន ២គូ នៅលើទីលាន ២ខេត្តផ្សេងគ្នា។

ការប្រកួតទាំងពីរនៅរសៀលថ្ងៃពុធ វេលាម៉ោង ៣:៣០រសៀលនេះរួមមាន ក្រុមតំណាងសាកលវិទ្យាល័យឯកជន អាស៊ី អឺរ៉ុប យូណាយធីត ដែលទើបបរាជ័យធ្ងន់ធ្ងរទល់នឹងក្រុមវិសាខា នឹងត្រូវបើកទ្វារផ្ទះកីឡដ្ឋាន AEU Sport Park នាទឹកដីឃុំស្វាយជ្រំ ស្រុកខ្សាច់កណ្តាលរបស់ខ្លួន ទទួលស្វាគមន៍ក្លិបបាល់ទាត់ណាហ្គាវើលដ៍ ដែលការប្រកួតនេះផ្សាយផ្ទាល់ដោយទំព័រហ្វេសប៊ុក Kampuchea Thmey Daily។

ដោយឡែក នៅពេលដំណាលគ្នានេះក៏មានការប្រកួតមួយគូទៀតរវាងក្រុមបាល់ទាត់គិរីវង់សុខសែនជ័យ នឹងបើកទ្វារកីឡដ្ឋានគិរីវង់ នាក្រុងដូនកែវ ខេត្តតាកែវ ទទួលស្វាគមន៍ក្រុមកងយោធពលខេមរភូមិន្ទ ដែលចេញដំណើរពីស្តាតចាស់ ប៉ុនប៉ងយក ៣ពិន្ទុសាជាថ្មី ក្រោយទើបបាន ៣ពិន្ទុរួចរាល់ពីក្រុមបាល់ទាត់ខេត្តព្រៃវែង។ ការប្រកួតនេះផ្សាយផ្ទាល់ដោយទំព័រហ្វេសប៊ុក និងកញ្ចក់ទូរទស្សន៍ BTV៕